Church Council Pidgin Report

2.3    LUPNG bai wok long kamap wok edukeisen insait long ol Lutheran Sios insait long PNG na kamapim ol wok edukeisen long ol pipol bilong em insait long PNG long mak bilong Universiti. LUPNG em bai kamapim fopela akademik skul o dipatmen long yia 2010. Dispela ol skul em; Tiologi, Edukeisen (primary, elementary na vokeisinol), nesing (ol as ples) na agribisinis.

2.4    LUPNG bai kamap wanpela ol top Universiti long givim ol gutpela sawe long ol sumatin long PNG na tu long rigin bilong South East Asia na Pacific.

2.5    Siaman bilong Komiti bai toktok na wok klostu wantaim ol komiti membas na tu ol stek holda long women kain wok ol mekim na long kamapim LUPNG.

2.6    Siaman bilong Komiti bai toksawe tu long ol Bishops bilong ELPNG, GLCPNG na tu Gavana bilong Morobe Provincial Government long ol wok bilong LUPNG na kisim edvais na direksen long ol long wok.

2.7    LUPNG Komiti bai wok klostu wantaim Office of Higher Education, Department of Education, Teaching Services Commission, Department of National Planning and Rural Development na tu ol arapela gavman dipatmen na agensis wantain donor long painim moni bilong kamapim wok bilong LUPNG.

2.8    LUPNG Komiti tu bai wok long kisim kain kain halivim ikam long wan wan man meri long kain kain wok or expeti long gaidim wok bilong LUPNG.

2.9    LUPNG Komiti bai tok orait long ol divelopmen plen long kamapim ol kain kain wok bilong LUPNG na mekim dispela ol wok karim kaikai na senisim ol plen bilong wok taim ol wok ikamap gut.

2.10    LUPNG bai kamapim wanpela Masta Plen bilong ol fisikol developmen bilong LUPNG.

2.11    Dispela komiti imas givim ol infomeisen igo long patna sios na tu long Morobe Provincial Government na National Government.

2.12    LUPNG Komiti imas kamapim Staf Divelopment program bilong BTC na MLS na arapela long kamap nupela level bilong manpower capasiti long mak bilong tis long Universiti level.

2.13    LUPNG bai givim dispela sans long skul long intanet (on line) or arapela long wea em istap.

2.14    LUPNG bai kamapim ol fisikol plen na akademik plen na program bilong kisim nupela inteik long 2010.

2.15    LUPNG bai kamapim website bilong em yet long tokaut long ol wok bilong em.

2.16    LUPNG bai kamapim nius leta long olgeta quata long salim ol infomeisen igo aut.

2.17    LUPNG bai putim aplikeisen igo long Department of Labour and Employment long kisim tok orait long ol posisen bilong bringim ol leksera bilong ovasis ikam tis hia na tu strongim wok bilong nesinol leksera long PNG na kamapim gutpela capasiti building program.

2.0    OL SENIS LONG LUPNG ACT

ELCPNG ibin kamapim sampela bikpela konsen long LUPNG Act long Sinod. Long kamapim ol senis long LUPNG Act olsem tok istap pinis long point 2 long Tems of Referens, LUPNG Komiti ilukim dispela ol namba wan priority. Dispela wok em istap autstandin yet. LUPNG long namba wantaim tru, em bin askim ol sios lida long givim tingting bilong ol long women kain senis imas kamap. Dispela ol senis imas kamap ples klia tru na ol komiti imas galisim gut tru ol dispela senis.

Palamen ibin passim Lutheran University Act long Novemba 15th 2006. Bihain long lo ipas, Komiti bin salim kopi bilong dispela lo igo long planti lain long kisim fid bek. Long dispela lo long kamap olsem lo na wok, National Government imas putim kamap long nesinol gazet. Nau yet em ihat long senisim Lutheran University Act long wanem National Government ino gazetim dispela lo olsem na long dispela as, senis ino inap kamap. Taim National Government is putim dispela long kamap long nesinol gazet, orait wanem kain ol senis long Lutheran University Act iken kamap. I gat taim yet long ting ting gut long wanem kain senis imas kamap na tok aut long ol dispela senis.

Lutheran Establishment Komiti em bai amamas tasol long tok tok wantaim ELCPNG Nasinol Sios Kaunsel long Lutheran University Act. Siaman bilong Establishment Komiti long planti taim askim pinis ol membas husat imakim ELCPNG long soim ting ting bilong ol long wanem kain senis ol laik kamapim long Establishment Komiti iken oraitim. Taim ol igazetim dispela lo, wanpela memba bilong Parliament iken bringim ol dispela senis na askim Parliament long wokim dispela senis long lo.

3.0    GRAUN NA OL ASET WEA MARTIN LUTHER SEMINARY NA BALOP EM ISTAP ANTAP LONG EN.

Graun na ol asset wea Martin Luther Seminary na Balop Teachers Koles istap em still bilong ELCPNG. Em bai ino gat senis long en na dispela em mas istap klia tru long ting ting bilong olgeta patnas.

Wea graun na ol samting istap antap long em wea inap long kamapim dispute long em, em LUPNG Komiti iwok long luk luk gut long em na traim painim sampela rot long putim LUPNG.   Nau yet, LUPNG bai usim Balop Teachers College na Martin Luther Seminary kempas na tu graun ino gat samting antap long em apsait long MLS. Sampela toktok bilong dispute ikamap na em nau istap long olgeta man long patnasip long sapotim long interest bilong LUPNG. Bikpela ting ting em olsem, dispiut bilong graun ino ken pasim wok bilong LUPNG na tu LUPNG ino ken wok antap long wea dispute bilong graun em istap. Tu ting ting imas klia tru long husat em papa tru bilong ol graun na asset nau istap na dispela em samting bilong ELCPNG.

Long dispela as, Establishment Komiti ibin pasim wanpela ting ting long August 11th 2007 olsem olgeta pati imas sindaun wantaim na kamapim wanpela agrimen long strongim dispela ting ting namel long ELCPNG, GLCPNG, MPG.

4.0    LUTHERAN UNIVERSITY GRANT NA MONI BILONG KAMAPIM NA RONIM WOK

Long ronim na mekim gut wok, LUPNG imas lukautim ol asset na tu moni ikam long Gavman na doneisen ikam long ol patnas na dona egensis. Ol dispela kain moni ikam em LUPNG mas mekim gut wok bihainim laik bilong husat ol dona or Gavman iputim dispela moni.

Long October 5th 2007, National Government ibin approvim na put K 3 Million long kamapim Lutheran University. Dispela moni ikam bihainim wanpela sabmisen em LUPNG Komiti ibin mekim na salim igo long National Government.   Dispela moni em ino bilong ELCPNG olsem resolution 08.09 olsem dispela moni imas igo long sios. Sabmissen, budget na rekod bilong moni long ao dispela moni igo aut em rekod em istap stret wantaim projek opis long husat patna ilaik lukim klia.

5.0    STRONGPELA SAPOT BILONG PROVINCIAL NA NATIONAL GOVERNMENT

Disisen bilong kamapim LUPNG long Lae aninit long menagmen bilong ELCPNG bai kamapim sampela gutpela na nupela senis long infrastraksa bilong sios na tu spiritual development bilong ol yanpela man meri bilong Morobe Provins na tu PNG olgeta. LUPNG ikamap aninit long bikpela ting ting bilong Medium Term Development Strategy bilong National Government (MTDS 2005-2010) wantaim dispela ting ting bilong kamapim moa speis long ol University level. Tu dispela ting ting isut stret wantaim strategi bilong National Government long kapasiti long edukeisen long PNG. Taget bilong dispela projek em long kamapim wanpela University long mitim pablik deman long University na tu long helivim wok sios.

Igat wanpela program long kamapim ol tisa igat gutpela University sawe long ao o iken wok wantaim ol pikinini long “Early Childhood Education”. Dispela ting ting em pos tru bilong gutpela education polisi na em sut stet long development bilong PNG olsem wanpela diveloping kantri.

National Government isapotim tru dispela project olsem wanpela project bilong sios na em luksawe tru long impotens bilong kamapim Lutheran University. Dispela ting ting em kamap strong taim National Government iekseptim na putim sampela moni aninit long National Public Investment Program (NPIP). Em ihat long kisim moni long National Government long wanem National Government ino gat planti moni istap tasol LUPNG is wok hat na gut na em ikisim sampela moni bikos em plenim gut wok, redi na put sabmisin igo in long taim stret wantaim olgeta pepa, staid na ol kain ripot long kisim moni.

Ol lain husat ipromotim dispela projek iwok had tru na klostu wantaim Department of National Planning and Monitoring, Treasury na Finance, Department of Education na Office of Higher Education. Gutpela wok tru ibin kamap namel long olgeta dispela lain long mekim wok bilong LUPNG igo het. Bihainim gutpela wok tru long plening na teknikol input long ol dispela Departments na tu LUPNG Komiti tim, ol itokim Hon. Luther Wenge LLB, MP Governor bilong Morobe Province olsem bai National Government iputim bikpela moni long sapotim dispela project long helpim ol pipol. Mista bilong Planning, Hon. Paul Teinsten, MP is raitim wanpela pas ikam long Governor Wenge LLB MP, na Siaman bilong LUPNG Komiti long Julai 18th 2008 na tok aut olsem dispela projek em igo tru long proses bilong sekim projek long Department of National Planning na Monitoring. Minista bilong Fainen, Hon. Patrick Puraitch tu itok pinis olsem em bai sapotim dispela projek long bazet bihain.

Office of Higher Education, Department of Education, na Teaching Services Commission ol laik tru long lukim dispela projek em stat quik taim. Department of National Planning isalim pinis wanpela pas igo long opis bilong Praim Minista. Office of Higher Education na Department of National Planning isawe salim ol wokman meri bilong ol long ikam sindaun long LUPNG Komiti long advaisim Komiti long wok bilong kamapim University na tu long soim interest bilong ol long dispela projek.

Siaman bilong Sam Sewe (PEC) long Morobe Provincial Government em sapotim tru dispela projek. Maski igat arapela nid long divelopment istap, LUPNG em wanpela bikpela nid long kamapim planti sawe man meri husat igat sawe long University level long kantri.

Hon. Luther Wenge, LLB, MP Governor bilong Morobe Province oltaim isave sapotim tru wok bilong LUPNG na long planti taim em ibun pinis wantaim Prime Minister, Gren Chiv Sir Micheal T Somare. long kisim tok orait bilong em long fandin bilong LUPNG long next bazet.   Praim Minista ibin tok aut long Governor olsem National Government bai put K33 Million long ol bazet bihain bai kam long wanwan yia long kamapim LUPNG. Dispela kain bazet em impotent na imas karim kaikai long helivim tru ELCPNG, kamapim ol sawe man meri, na tu ol yangpela man meri bilong PNG.

Insait long National Parliament, aut long olgeta 109 membas, 37 em ol Lutheran Membas. Olgeta Lutheran membas ibin sapotim tru dispela tingting and kamapim bikpela politikol influens long mekim LUPNG ikarim kaikai. Dispela sapot long National na Provincial Government isoim tru ol taim em rait long kamapim LUPNG projek. Nogut bihain bai dispela kain sapot ino inap ikam o stap.

6.0    SAPOT BILONG OL GRAS RUTS LONG DISPELA PROJECT ISTAP STRONG

Igat strongpela grasruts sapot long dispela projek long ol man meri na tu long sios olgeta. Pablik isawe olsem igat kain skul olsem MLS istap na tu igat sampela hevi long fainens, wokman na ol kain kain senis iwok long ikam. Bung wantaim LUPNG bai kamap wanpela gutpela rot long strong wok bilong ol tu long bihain taim.

Ol papa graun long as ples isoim tingting olsem bikpela hap graun bilong sios isindaun nating na ino mekim wok. Olsem na long givim wok long graun long LUPNG em gutpela ting ting. Sampela ol papa graun isoim ting ting olsem ol iken givim moa graun long sios sapos University ilaikim moa graun. Ol laik givim graun long wok bilong LUPNG na sios na ino long givim long wok binis.

Papa mama bilong Lutheran sios ol sawe tru olsem arapela sista sios olsem; Catholic, Seventh Day Adventist ol igat University bilong ol yet. Tu sampela papa mama ino sawe amamas tumas long salim ol pikinini bilong ol igo long University olsem; UPNG na arapela skul bikos long sampela kain hevi, quality na ol pait nabaut long University. Olsem na em moa gut long kamapim University bilong ol Lutheran yet. Sampela man merit tu ino laik salim ol pikinini bilong ol inap LUPNG ikamap olsem na ol larim ol pikinini bilong ol istap yet.

7.0    SAIT LONG MONI I LUK GUT

Wanpela sabmisin ibin igo pinis long Department of National Planning and Monitoring, Department of Education, Office of Higher Education (OHE). Bihainim dispela ting ting, Office of Higher Education em salim pinis K 3 Million ikam long LUPNG long 2007 Saplimentari Bazet. Dispela moni bai karim aut wok na kamapim program bilong LUPNG bihainim wok mak, moni plen na tu Tems ov Referens. Aut long ol dispela moni, eiti pesent (80%) em igo long kapasiti bildin bilong ol tisa long Balop Teachers College na Martin Luther Seminary na ap bilong dispela moni mak olsem K 250,000 igo long Masta Plenin, internet na ronim opis bilong projek.

Dispela projek igat fopela hap bilong em long ol dona iken skelim. Department of National Planning bai toksawe long husat tru em ol kain dona inap long LUPNG iken wok klostu na kisim sapot long ol. Igat fopela eria em LUPNG Komiti iwok long traim long kisim sapot long em;

1.    Booker Tate International long British bai givim sapot long said bilong Agribisnis. Nau yet ol plen bilong iwok long kamap long Booker Tate long helpim long raitim kos bilong Agribinis long kamap long internesinol level.

2.    Halivim long German Embassy na tu European Union

3.    Halivim long Australia bambai ikam long Queenland University long ol pren bilong Mr. Pato

4.    Sabmission tu bai igo long Chinese Government long askim long sapot. Askim igo pinis long Ambassador bilong China na igat gutpela wok poroman ikamap namel long LUPNG namel long moni mak olsem, 1.5 na 2 Million kina.

Deloittes iwok long halivim LUPNG long kamapim wanpela Charitable Trust – long kisim moni ikam long National Government o doneisen ikam long arapela man meri. Ol kampani na wan wan man meri tu ol inap long kisim diduksen long tax sapos ol givim olsem doneisen long sapotim LUPNG aninit long Charitable Tax.

8.0    OL BIKPELA KONSEN BILONG PATNA SIOS

Igat wanpela wokabaut igo long Lutheran Education Association long St. Louis na Germany. Dispela wokabaut em long salim ting ting bilong Lutheran University na painin ol ovasis poroman long wok bilong LUPNG. Delegation em bin lukluk long sampela rot na tu askim long teknikol assistance long ol ovasis sios divelopment patnas. Tu em bin kamap wanpela gut sans long tok tenkiu long ol patna sios long ol halivim bilong ol.

Bikpela as ting ting tru em long painim ol gutpela leksera na kisim sapot ikam long ol mama sios long dispela kain eria na tok aut long olsem PNG em ino beibi moa. Em kamap man pinis na em strong inap long kamapi University bilong em yet.

Ol sampela ting ting ibin pas or hangamap istap long ting ting bilong mama Sios ol rausim pinis; kain olsem ol partner long German Church. Nau yet ol igat gutpela ting ting long LUPNG projek.   German sios patna em lukluk long gutpela neim bilong projek olsem na pasin bilong wok gut long kamapim dispela projek em gutpela.

Wanpela pasin bilong patna sios em long wok klostu wantaim ELCPNG taim ol inegotiatim projek stret wantaim ELCPNG na ino wantain ol institusen bilong ELCPNG. LUPNG Komiti nau askim ELCPNG na GLCPNG long makim LUPNG na askim ol patna bilong ol long sapotim dispela projek. Aninit long wanbel bilong ol patnas, ol sios patnas igat wok long sapotim LUPNG projek na disisen ol mekim em ol gutpela bilong projek olgeta.

9.0    MARTIN LUTHER SEMINARY, PASTO TREININ NA THEOLOGIKOL EDUKEISEN EM BAI ISTAP.

Wok bilong pasto treinin long MLS em bun tru bilong wok na em bai stap namel tru bilong wok bilong LUPNG. Australian Lutheran College Mr. Greg Schiller, Dr. Greg Lockwood, na Dr. Malcom Bautch bai wok long strongim na mekim kamap wok bilong pasto treinin program long MLS. Ol bai wok wantain long lukautim treinin bilong ol pasto na ol kamapim sampela gutpela ting ting long mekim MLS long igat sampela pawa bilong em yet. Dispela ting ting em istap na LUPNG Komiti iwok long skelim istap. Bai igat tupela kain skul bilong Tiologi edukeisen. Wanpela em Tiology digri long pasto treinin, em wanpela yia treinin na narapela em gradueit diploma treinin. Tu bai igat Batsela ov Ministri Digri bilong lei man long sios.

10.0    KARIKULAM DIVELOPMEN

LUPNG em bai givim ol program istap long intanesinol level na tu arapela University long PNG ino givim.

Mr. Greg Schiller ibin soim dispela program long internet long Tiologi edukeisen long late Bishop Kigasung na tu LUPNG Komiti. Dr. Greg Lockwood em senisim dispela kos liklik. Em amamas tru long dispela nupela wok em mekim. Australia Lutheran College bai tokaut long Komiti long wanem samting ol bai mekim bihain long stretim ol karikulam. Dispela ol kos autline em istap pinis long Website bilong LUPNG.

LUPNG iwok long kamapim wanpela fo yia Primari Edukeisen Digri long lukluk long Early Childhood Education na kos bilong rit na raitim gut tok inglis.   Balop Teachers College ol wok long raitim dispela kos na wanpela tim iwok long dispela. Dispela tu em istap long Website bilong LUPNG.

LUPNG tu idivelopim wanpela kos kolim; After Degree in Secondary Education
(two-year program) wantaim as ting ting long wok bilong Literasi na Fain Ats. Mrs. Demitra Flessa ( wanpela volunteer long Port Moresby) iwok long em istap wantaim tim long BTC. Hap bilong dispela kos em ol soim pinis long LUPNG Komiti.

LUPNG is kamapim wanpela fo (4) yia Agribisnis digri kos. Wok agrikalsa na bisnis em wanpela gut kos long halim ol dispela kain lain husat ipinis long skul na kisim sawe bilong wok didiman na kamap bisnis man long ples. Bikpela ting ting em long luk luk long ol risos bilong kantri long sait bilong agrikalsa, fis, diwai. Dr. Galgal na kampani bilong em iwok long em istap na klostu bai ol ipinis dispela wok. Dispela kost em gutpela na narakain olgeta long bungim wok didiman na wok bisnis.

LUPNG tu bai givim fo yia nesin kos wea em bai spesolais long as ples stret long sapotim wok ministri bilong sios long sait bilong sios helt senta na aid post. Kain nupela sik na hevi olsem HIV/AIDS, TB, Malaria em tu bai istap bun bilong dispela kos.

11.0    MASTA PLEN BILONG RIPEA, MEINTENANS NA NUPELA WOK INFRASTRAKSA.

LUPNG Komiti iskelim gut tru ol kain kain ting ting long proposal bilong Masta Plenin. Komiti igivim wok igo long Infratech Management Consultant, wanpela kontrak long kamapim wanpela masta plen bilong LUPNG. Dispela em wanpela bikpela wok tru long wanem em imas soim LUPNG em narakain University olgeta na nupela wea em bai bringim nupela sawe long PNG.

Dispela Masta Plen em bai soim ao LUPNG bai putim na mekim kamap ol wok bilong em na wokim igo igo kamap long mak bilong em. Em bai soim ol patna na arapela man ao LUPNG bai luk olsem wanem long narapela 10, 20 o 50 yia. Olsem na wok bilong bringim ol gutpela sawe man bilong mekim kamapim LUPNG Masta Plen em istap namba wan stret. Dispela wok em bai kos bikpela moni tu tasol sapos ino gat gutpela plen bai wok em pundaun.

Mr. Mark Flynn bilong IMC em presentim pinis wok bilong em long LUPNG Komiti na Komiti imekim sampela tok tok long Masta Plen pinis. Fainol ripot bai igat tripela hap;

1.    Em soim wea bai long haus bai sanap
2.    Em soim wanem kain graun, hamas ren sawe pundaun, drain
3.    Masta plen wantain drowin long gaidim divelopmen bilong LUPNG long narapela 20 yias.

Mr. Mark Flynn em tok olsem dispela wok bilong masta plen em klostu pinis. Bihain long ol pinis bai ol soim wea ol haus bai kamap na tu ao ol haus nau istap iken istap longpela liklik. Nupela ol haus em bai ol disainim long kain san na ren bilong PNG stret. Em tu tok tok long nid bilong kamapim LUPNG long wanpela hap ino tupela hap na em tok olsem graun long MLS em gutpela moa long dispela kain ting ting. Em tok tu olsem ol haus long BTC na MLS em ino gutpela tumas.

Kos bilong wokim ol nupela haus em bai olsem K16 Million. Dispela em ol kain haus olsem, dom, leksa tiata, well senta, librari, na tu long stretim ol haus ibagarap pinis. Moni bilong dispela wok em LUPNG Komiti ilukluk long kisim next yia long National Government.

12.    LUK LUK LONG VAIS SENSELA NA OVASIS LEKSELA

Posisen bilong vais sensela em kamap pinis long nius pepa. LUPNG Komiti ilukluk long wanpela sot taim Vais Sensela husat igat experiens long kamapim nupela University long graun na igo antap na tu man igat sawe long reisim fan long wok bilong University.

Igat lokolaiseisen plen istap pinis long Department of Labour and Employment. Tu igat wanpela application em LUPNG Komiti iputim pinis igo long long Department of Labour and Employment na ol iapprovim pinis 15 pela non-sitizen position. LUPNG bai kisim ol leksera na ol profesa long Australia, America, Canada na Germany. Tu igat wok bilong kisim wok pemit na visa tu em wok long kamap.

13.    POST GRADUET DIGRI PROGRAM LONG UPGREIDIM SAWE BILONG LEKSERA

Igat wanpela patnasip program istap pinis nau long upgredim sawe bilong ol leksera long BTC. Dispela program bai stat long October. Em bai kisim olsem wan yia six mun long pinis dispela program. Dispela program bai kos klostu olsem K 1 Million na tu em hap bilong bazet plen bilong 2007 Saplimentari Bazet. Olgeta lain long Government na tisa ol hamamas long dispela program long wanem em bai divelopim tru sawe bilong ol lekseras long sait bilong human risos, kapasiti bildin, christain karekta na lidasip.

LUPNG Komiti iluk luk gut long dispela program long wokim masta digri long edukeisen bilong 23 Lutherans long PNG. Komiti igivim Charles Stuart Universiti kontrak long dispela servis. Dispela tu em wanpela gutpela rot tru long upgredim stendet bilong ol leksera long redi long stat long 2010. Antap long dispelam, Australian Lutheran College long Adelaide bai halivim long wok bilong karikulum divelopmen long edvens digri bilong MLS.,

14.0    KOMINIKEISEN NA WEBSITE

Olgeta wok bilong LUPNG long stat ikam inap long nau em istap long Website bilong LUPNG long ol man iken lukim na tu mekim tok tok o koment long en. DIspela website em; www.lupng.org. Eni man meri ken igo long dispela website na lukim ao LUPNG iwok long kamap ikam nao. Tu igat nius leta em wok long kamap long olgeta mun.

15.0    TRENSPARENSI NA OUPEN DIALOG

Igat nid long wok bung na tok tok stret long wok, raitim pas long narapela man long pasin honest na gut long dispela projek. PNG igat bikpela nid tru istap long ol pipol bilong na wantaim dispela kain bikpela visin em gutpela tru. Olgeta man husat iwok insait o autsait long dispela projek long wanpela or arapela wei, em mas oupen long mitim sampela ol kain nid istap.

Yumi olgeta mas wok bung wantaim na bungim olgeta ting ting na helpim arapela man long soim rot na wei bilong wok bilong LUPNG. Long dispela kain rot tasol, yumi inap long mekim dispela bikpela driman kamap tru na em bai karim kai kai.   Olgeta tok mas stret, klia long mekim dispela projek igo fowed.

16.    AUTKAMS NA GUTPELA BILONG LUPNG.

Igat planti gutpela samting long dispela projek taim yumi lukim dispela projek iwok long kamap isi isi. Em bai kisim sampela taim long yumi lukim dispela projek kamap tasol sapos yumi olgeta isanap wantaim ol patnas bilong yumi na wantaim sapot bilong National Government na Morobe Provincial Government yumi inap long pinisim dispela gutpela projek. Wanpela dei bai yumi inap sindaun na luk luk bek na lukim sampela gutpela na nupela infrastraksa istap long dispela University wea ol pikinini wantain ol tumbuna bilong yumi iken usim.

Dispela University inap long givim bek sampela gutpela Kristen pasin long ol yanpela man, pasto, lidas bilong yumi long lukautim nupela genereisen bilong kantri bilong yumi.

Tasol long nau yet, mi luk fowed long fes gradueisen husat bai igo long ol primary skul, elementary skul, sekendari skul, haus marasin na tu ol planteisen bilong yumi long mekim wok na apim level bilong sevis bilong yumi.

Tenk yu na God iken blessim yu, dispela sios na olgeta ministry servis long Glory bilong Neim bilong God Antap.